Duniya Say Mujhay Piyar Tha

Duniya say mujhay piyar tha, Sab bhool chuka hoon
Ik shakhs mera yaar tha, Sab bhool chuka hoon

woh hijr ki raatoon ke sulagtay howe lamhay !
Aankhoon pe koi baar tha, Sab bhool chuka hoon

Haan ! meri khata thi ke tujhay toot k chaha
Haan ! mein hi gunahgaar tha, Sab bhool chuka hoon

Yeh kis nay mujhay dhoop ka ik roop diya hay
Main saaya-e-deewar tha, Sab bhool chuka hoon

Ab gham mujhay deemak ki tarah chaat rahay hain
Main khushiyoon say sarshar tha, Sab bhool chuka hoon

Bhijwata tha tujh ko kabhi chorri, kabhi kangan
Main kitna khanak dar tha, Sab bhool chuka hoon

Bakhshi hay mujhay piyar ke badlay mein Judai
Jo bhi tera kirdaar tha, Sab bhool chuka hoon

Khushbu bharay roomal kahan yaad hain mujh ko?
Tu kitna Waza'e daar tha, Sab bhool chuka hoon

Aankhain shab-e-furqat mein raha karti thien purnam
Main tera talab gaar tha, Sab bhool chuka hoon

Bas itna mujhay yaad hay Ik wasal ki shab thi
Iqrar tha, Inkaar tha, Sab bhool chuka hoon

Sach maan ke ab kuch bhi mujhay yaad nahi hay
Tu kis ka taraf daar tha? Sab bhool chuka hoon

Ik shakhs nay paagal sa bana rakha hay Wasiq
Main kitna samajhdaar tha? Sab bhool chuka hoon......