Apni khatir jagay ho, Soye ho
Apni khatir hansay ho, Roye ho
Kis liye, Aaj khoye khoye ho
Tum nay aansoo bohot piye apnay
Tum bohot saal rah liye apnay
Ab Meray, Sirf meray ho kar raho
Husn hi husn ho, Zahanat ho
Ishq hoon mein tu tum Mohabbat ho
Tum meri bas meri amanat ho
Jee liye jis qadar jiye apnay
Tum bohot saal rah liye apnay
Ab meray , Sirf meray ho kar raho
Rahtay ho ranj-o-gham ke ghairon main
Dukh ke, Aasaib ke basairoon main
Kaisay choroon tumhe andhairoon main
Tum ko day doon ga sab Diye apnay
Tum bohot saal rah liye apnay
Ab meray , Sirf meray ho kar raho
Tum azal say dukhoon ke deray ho
Chahe khud ko ghamoon say ghairay ho
Jab say paida howe ho meray ho
Aaj kholain ge lab siye apnay
Tum bohot saal rah liye apnay
Ab meray , Sirf mery ho kar raho
Ab mujhay apnay dard sahnay do
Dil ke har baat Dil say kahnay do
Meri banhoon mein khud ko bahnay do
Muddatoon Zakhm khud siye apnay
Tum bohot saal rah liye apnay
Ab meray , Sirf meray ho kar raho.....
No comments:
Post a Comment