Us Ne Sakoot-e-Shab Main Bhi

Us ne sakoot-e-shab main bhi apna payam rakh diya
Hijr ki raat baam per mah-e-tamam rakh diya

Aamd-e-dost ki naveed koo-e-wafa main aam thi
Main ne bhi ik charagh sa dil sare-e-shaam rakh diya

Shidat-e-tishnagi main bhi ghairat-e-mai kashi rahi
Us ne jo pher li nazar main ne bhi jaam rakh diya

Dekho ye mere khawab thay, dekho ye mere zakhm hain
Main ne tu sub hisaab-e-jaan bar sar-e-aam rakh diya

Us ne nazar nazar main hi aisay bhalay sukhan kahay
Main ne tu us ke paaon main sara kalam rakh diya


Aur faraz chahiyain kitni muhabattain tujhay
Maon ne tere naam per bachon ka naam rakh diya