Ye Dag Dag Ujala

Ye dag dag ujala, ye shabgazida sahar
Wo intazar tha jis ka, ye wo sahar to nahin

Ye wo sahar to nahin jis ki arzu lekar
Chale the yar ke mil jayegi kahin na kahin
Falak ke dasht main taron ki akhari manzil
Kahin to hoga shab-e-sust mauj ka sahil
Kahin to ja ke rukga safina-e-gam-e-dil
Jawan lahu ki pur-asrar shaharahon se
Chale jo yar to daman pe kitne hath pare
Dayar-e-husn ki be-sabr khwab-gahon se
Pukarati rahin bahen, badan bulate rahe
Bahut aziz thi lekin rukh-e-sahar ki lagan
Bahut qarin tha hasinan-e-nur ka daman
Subuk subuk thi tamanna, dabi dabi thi thakan

Suna hai ho bhi chuka hai firaq-e-zulmat-e-nur
Suna hai ho bhi chuka hai wisal-e-manzil-o-gam
Badal chuka hai bahut ahl-e-dard ka dastur
Nishat-e-wasl halal-o-azab-e-hijr-e-haram
Jigar ki ag, nazar ki umang, dil ki jalan
Kisi pe chara-e-hijran ka kuch asar hi nahi
Kahan se ai nigar-e-saba, kidhar ko gai
Abhi chirag-e-sar-e-rah ko kuch khabar hi nahi
Abhi garani-e-shab main kami nahi ai
Najat-e-dida-o-dil ki ghari nahi ai
Chale chalo ke wo manzil abhi nahi ai