Zindagi Ke Mele Main

Zindagi ke mele main
Khvahishon ke rele main
Tum se kya kahen jana
Is qadar jhamele main
Waqt ki ravani hai
Bakht ki girani hai
Sakht bezamini hai
Sakht lamakani hai
Hijr ke samandar main
Takht aur takhte ki
Ek hi kahani hai
Tum ko jo sunani hai
Bat go zara si hai
Bat umr bhar ki hai
Umr bhar ki baten kab
Do ghari main hoti hain
Dard ke samandar main
An-ginat jaziren hain
Beshumar moti hain
Ankh ke dariche main
Tum ne jo sajaya tha
Bat us diye ki hai
Bat us gile ki hai
Jo lahu ki khilvat main
Chor ban ke ata hai
Lafz ki fasilon par
Tut tut jata hai
Zindagi se lambi hai
Bat ratjage ki hai
Raste main kaise ho
Bat takhliye ki hai
Takhliye ki baton main
Guftagu izafi hai
Pyar karne valon ko
Ik nigah kafi hai
Ho saky to sun jao
Ek din akale main
Tum se kya kahen jana
Is qadar jhamele main